الكنافة البورما والكنافة بالقشطه من مطبخ انجي للشهر الفضيل نوروني يسعدني وجودكم دايما

الوصفة الاولى

كنافة

سمنة بلدي
دي اهم حاجه
اما الحشوات فبتختلف من كل صنف للتاني



وعن تجربة علي شان تحصلي علي كنافة طرية
استبعدي السكر البودرة او الخشن علي الكنافة قبل التسوية
لا السكر بيعطي قرمشة للكنافه
كمان السمنة الكتير علي الكنافة بتخليها تقرمش
يعني لو حباها طرية قللي من السمنه
اما لو حباها مقرمشة فزيدي من السمنه
انا كان عندي 2 كيلو كنافه
عملت بيهم اشكال مختلفة من الكنافة
اول صنف
الكنافة البورما
ودي مكوناتها
كنافة
فسدق ده الحشو الاساسي
وممكن تستبدليه بزبيب او اي مكسرات تانيه
شربات
سمنه بلدي
واهم شيء تكون الكنافة طازة
وقطعه واحده حتي يسهل علينا لفها
وعلي شان الحشوة تظبط معنا
نضيف للفسدق معلقة عسل او شربات
علي شان تمسك في الكنافه ومتسقطش منا
الطريقة
بناخد قطعه من الكنافة ونرش عليها السمنه البلدي
ونحط الحشوة علي الكنافة
ونحاول نلفها بالراحه بحيث تكون الحشوة في المنتصف



ونضغط علي رول الكنافه علي شان لا تفك منا



لو لقيتيها بتفك
لفي عليها خيط
وحاولي تبرميها في ايدك وكانك بتعصري قطعة قماش
وحطيها في صاج واتركيها في الهوا تاخد رطوبة الجو وتنشف
وقبل ما تدخليها الفرن رشي عليها كمان حبة سمنه بلدي
وسويها في الفرن وهي بتستوي قلبيها علي شان تاخد اللون الدهبي من كل جانب
ولما تطلع من الفرن علي طول اسقيها الشربات التقيل
واتركيها تبرد قبل التقطيع


واهم شيء تكون ملفوفه كويس
وشرباتها تقيل حبه
ونستناها تبرد قبل ما نقطعها
ودي نتيجتها بعد التسوية


وطعمها بجد بجد ولا احلي محل حلوووووواني




الوصفه التانية
كورنية الكنافه بحشوة القشطه والكريم كراميل
الحشوة
عبارة عن كريم كراميل بنسويه
ونضيفه علي مهلبيه
وعلبة قشطه
حشوة طعمها ممتااااااااااااز



وطعمها في الكنافه رهيب
وممكن تضيفي عليها كمان كريمة شانتيه
ولما جهزت الحشوة دي
جبت كنافة طازة ولفيتها علي الاقماع
وطبعا رشيت السمنة الاول علي الكنافه



ولفيت الكنافه



ولما سويتها في الفرن
سقيتها الشربات
وحشيتها بالحشوة الرهيبه اللي عملتها من الكريم كراميل والمهلبيه والقشطه والكريم شانتيه
بجد حشوةتستاهل التجربه






وكمان عملت كب كيك
كنافه بنفس الحشوة دي



ودي حطيت حبة من الكنافه في قالب الكب كيك
ورشيت عليها السمنه
وسويتها
ولما خرجتها من الفرن سقيتها شربات
وحشيتها بالشكل ده



كمان عملت كب كيك وحشيته بالحشوة وغطيته برضوا بالكنافه
وده شكله



وكمان عملت خلية النحل بالكنافه
ودي بسيطه جدا
بناخد قطعه من الكنافه وبنكورها ونضغط عليها جامد جدا
وبنحطها في الصنيه
ونكور قطعه تاني وهكذا
ورشيت عليها السمنه البلدي
وسويتها في الفرن




ولما طلعتها سقيتها بالشربات



بنقدمها كلها
او بالشكل ده
وممكن نحشيها او ممكن نخليها ساده