خلطتي لتطويل شعري والحمد لله وصلت ومستمره .....

النهارده جايبلكم وصفه تانيه بعد ما الحمد لله لقيت منها تغير ملحووظ جدا في شعري ولسه مكمله فيها بس ربنا يبعد عننا الكسل

الوصفه دي كنت بستخدمها مع وصفه الزبادي هتلاقوه في مواضيعي

من دون رغي كتير
الوصفه دي خدتها من وحده من شرق اسيا وانا قاعده بدور على النت لخلطه تطول الشعر لان كنت قصيت شعري من فتره وعيزاه يطول تاني خاصه لما لقيت جوزي بيبدي اعجابه الشدييييد بالشعر الطويل وفعلا والله ماشاء الله بيبقي رووعه هو عايز شويه اهتمام وهتبقي تمام التمام
حتي لما يبقي على ظهرك مفرود كده بيبقي شكله وااااااو

ندخل بقي في الوصفه
هنحتاج 125 مل من زيت الخروع
وانا استخدمت شركه وادي النحل ددي احسن شركه عندنا في السعوديه فحطيت كل الازازه لان ده حجمها



وهنحتاج 7 معالق زيت سمسم و7 معالق زيت لوز حلو





تمام كده
هنقلبهم مع بعض ونحطهم في برطمان قزاز

تستخدميهم ازاي ياشاطره
هي كانت بتحطهم في علبه كده ليها بوز رفيع من فوق وبتفرق الشعر وتحط على الفروه وتدعك

زي كده التفريق اتمني تكون وصلت الفكره




انا جبت سرنجه وبقيت اسحب وامشي على الفروه بعد مااقسم شعري وادعك برضه وفي الاخر مسحه على الشعر ولو عندك الاطراف متضرره حطي عليها برضه شويه وادعكيها

والبسي كيس او كاب واحكميه والبسي فوقه ايشارب بس كده بتتحط على الشعر من 3 الى اربع ساعات
وبتغسلي شعرك بشامبو مخفف كوبايه ميه تقلبي فيها شويه شامبو وتغسلي وتدعكي بهدوء وبس كده


انا كنت كمان بحط على مقدمه شعري لانه كان خف شويه وماشاء الله شعري نبت وبقي حلو الحمد لله

النتيجه لاحظتها بعد شهر من الاستخدام المستمر كنت بعملها من مرتين لتلات مرات والغالبيه مرتين الصراحه بعد شعرين حسيت ان قد كف ايدي طول من شعري

وعلشان عارفه هتقولولي كان فين كان تحت رقبتي بشويه ودلوقتي معدي نص ظهري الحمد لله يعني مداومه كمان بس ربنا يقويني يارب علشان العيال بيجننوني وان شاء الله يوصل لاخر ظهري دعواتكم بقي ليه

ياريت لو حد جربها يجي يقولنا ايه اللي حصل معاه وان شاء الله تفيدكم
وعلى فكره لو حطتوها وعملتم شغل البيت وبعد كده غسلتم شعركم كده احلو واحلى لامك بتعرقي ومسام الشعر بتتفتح